Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 17
5नवी दिल्ली, दि. 18 (वृत्तसंस्था) : जम्मू-काश्मीरमधील नियंत्रण रेषेवरून पाकिस्तानबरोबर सुरू असलेला व्यापार केंद्र सरकारने शुक्रवारपासून स्थगित करण्याचा निर्णय घेतला आहे. केंद्रीय गृह मंत्रालयाने गुरुवारी या संबंधीचा आदेश दिला. नियंत्रण रेषेवरील व्यापारी मार्गाने पाकिस्तानातून दहशतवाद्यांसाठी शस्त्रास्त्रे, अंमली पदार्थ आणि बनावट भारतीय चलनाची तस्करी होत असल्याने हा निर्णय घेण्यात आला आहे, असे सूत्रांनी सांगितले. बंदी घातलेल्या दहशतवादी संघटनांशी संबंधित असलेले लोक नियंत्रण रेषेवरील व्यापारामध्ये सहभागी असल्याचे निष्पन्न झाले आहे, असे केंद्रीय गृह मंत्रालयाने आपल्या आदेशात म्हटले आहे. जम्मू-काश्मीर आणि पाकव्याप्त काश्मीरमध्ये गेले काही काळ बंद असलेला व्यापार या आठवड्यात मंगळवारीच सुरू झाला होता. हा व्यापार दोन आठवड्यांपासून बंद होता. पाकिस्तानकडून नियंत्रण रेषेवर तोफगोळ्यांचा मारा होत असल्याने भारताने एक एप्रिलपासून तेथील व्यापार आणि      प्रवास स्थगित केला होता.
Friday, April 19, 2019 AT 08:43 PM (IST)
5नवी दिल्ली, दि. 11 (वृत्तसंस्था) : पाकिस्तानच्या हवाई दलाच्या वैमानिकांना फ्रान्सने राफेल विमान उड्डाणाचे प्रशिक्षण दिल्याच्या वृत्ताचा फ्रान्सचे भारतातील राजदूत अलेक्झांडर जिग्लर यांनी स्पष्ट शब्दांत इन्कार केला. ही फेक न्यूज आहे, असे जिग्लर यांनी सांगितले. अमेरिकेच्या एका संकेतस्थळाने दावा केला होता की, फ्रान्सने कतारला राफेल विमाने विकल्यानंतर नोव्हेंबर 2017 मध्ये फ्रान्सने पाकिस्तानी हवाई दलाच्या वैमानिकांना या विमानांच्या उड्डाणाचे प्रशिक्षण दिले होते. पाकिस्तानी वैमानिक म्हणजे ‘एक्स्चेंज ऑफिसर्स’ होते, असा दावा या संकेतस्थळाने केला होता. पाकिस्तानचे पश्‍चिम आशियातील अनेक देशांशी सैन्य संबंध आहेत. अदलाबदल कार्यक्रमांतर्गत त्यांचे सैन्य अधिकारी कतार, जॉर्डन, सौदी आदी देशांमध्ये जातात.    या देशांचे अधिकारीही पाकिस्तानात येतात. संकेतस्थळाच्या दाव्यानुसार कतारला मे 2015 मध्ये 6.3 अब्ज युरोमध्ये 24 राफेल विमाने खरेदी करारानुसार विमाने मिळाली होती. दरम्यान, ही बातमी प्रसिद्ध झाल्यानंतर काँग्रेसने त्यावर गंभीर  चिंता व्यक्त केली होती.
Friday, April 12, 2019 AT 08:46 PM (IST)
5उत्तरप्रदेश, दि. 7 (वृत्तसंस्था) : उत्तर प्रदेशातील देवबंदमध्ये बसपा, सपा आणि राष्ट्रीय लोकदल यांची पहिली संयुक्त जाहीरसभा झाली. काँग्रेसवर विश्‍वास ठेवू नका आणि भाजपचा पराभव करण्यासाठी महाआघाडीला मत द्या, असे आवाहन बसपाच्या सर्वेसर्वा मायावती यांनी मुस्लीम समाजाला केले आहे. मायावती यांनी पंतप्रधान नरेंद्र मोदी आणि काँग्रेसवर हल्लाबोल केला. महाआघाडीच्या रॅलीत लोटलेल्या जनसागराची माहिती मोदींना मिळाल्यावर ते वेडे होतील आणि ‘सराब-सराब’ म्हणत फिरतील, अशी टीका त्यांनी केली. ईव्हीएममध्ये कुठलीही छेडछाड झाली नाही तर निवडणुकीत महाआघाडीचा विजय होईल. भाजपच्या छोट्या-मोठ्या चौकीदारांनी काहीही केले तरी त्यांच्या हाती काहीच लागणार नाही. ‘अच्छे दिन’चं आश्‍वासन देऊन मोदींनी जनतेची दिशाभूल केली आहे. सरकारी तिजोरी लुटलीय. कुठल्याही तयारीविना नोटाबंदी आणि जीएसटी लागू केल्याने बेरोजगारी वाढली. तसेच आरक्षण व्यवस्था भाजपच्या काळात कमकुवत झाली. भाजपने धनदांडग्यांना अधिक श्रीमंत केले. यामुळे भाजपची सत्ता जाईल आणि महाआघाडी सत्तेत येईल, असे मायावती यांनी सांगितले.
Monday, April 08, 2019 AT 09:01 PM (IST)
5नवी दिल्ली, दि. 3(वृत्तसंस्था) : अमेरिकेने सुमारे 2.4 अब्ज डॉलर किमतीचे 24 बहुपयोगी ‘एमएच 60 रोमिओ सी हॉक’ हेलिकॉप्टरची भारताला विक्री करण्यास मंजुरी दिली असल्याची माहिती अमेरिकेच्या परराष्ट्र मंत्रालयाने दिली. भारताला मागील एक दशकाहून अधिक काळापासून इन हंटर हेलिकॉप्टरची गरज होती. लॉकहिड मार्टिनद्वारे निर्मित हेलिकॉप्टर पाणबुडी आणि जहाजांवर अचूक निशाणा साधण्यास सक्षम आहेत. हे हेलिकॉप्टर जगातील सर्वात अत्याधुनिक समुद्री हेलिकॉप्टर मानले जाते. यामुळे भारतीय नौदलाची मारक क्षमता वाढणार आहे. ट्रम्प प्रशासनाने मंगळवारी 24 एमएच 60 आर बहुपयोगी हेलिकॉप्टरच्या विक्रीस मंजुरी दिली. या हेलिकॉप्टरमुळे भारतीय संरक्षण दल आणखी मजबूत होणार आहे. अमेरिकेने अधिसूचनेत म्हटले आहे, की प्रस्तावित विक्रीमुळे भारत आणि अमेरिका यांच्यातील सामरिक संबंध आणखी मजबूत होतील. त्याचबरोबर अमेरिकेची विदेश नीती आणि राष्ट्रीय सुरक्षा मजबूत होण्यास मदत मिळेल. या हेलिकॉप्टरची अंदाजे किंमत ही 2.4 अब्ज डॉलर असेल. यामुळे क्षेत्रिय संकटांना सामोरे जाण्यास भारताला मदत मिळेल आणि त्यांची गृह सुरक्षाही मजबूत होईल.
Thursday, April 04, 2019 AT 08:56 PM (IST)
5नवी दिल्ली, दि. 5 (वृत्तसंस्था) : व्यापाराच्या बाबतीत भारताला दिलेला विशेष पसंतीचा दर्जा अमेरिकेतील डोनाल्ड ट्रम्प सरकारने काढून घेण्याचा निर्णय  घेतला आहे. या निर्णयामुळे भारतातून अमेरिकेत निर्यात होणार्‍या वस्तूंवरील करसवलती रद्द होणार आहेत. अमेरिका सरकारचा हा निर्णय दोन्ही देशातील द्विपक्षीय व्यापाराला धक्का पोहोचवणारा असल्याचे मानले जात आहे. जनरलाइज्ड सिस्टिम ऑफ प्रेफरन्स (जीएसपी) अंतर्गत भारताकडून आयात केल्या जाणार्‍या सुमारे 400 अब्ज किंमतीच्या वस्तूंवर अमेरिका कोणतेही शुल्क आकारत नव्हते. त्यामुळे भारताला 19 ते 20 कोटींचा फायदा होत होता. मात्र, अमेरिकेने जीएसपी दर्जा काढून घेण्याचा निर्णय घेतल्यामुळे भारताला आता हा फायदा मिळणार नाही. अमेरिकी सिनेटमध्ये डोनाल्ड ट्रम्प यांनी नुकतीच ही घोषणा केली. भारताबरोबरच तुर्कीचाही जीएसपी दर्जा काढून घेत असल्याचे त्यांनी जाहीर केले. भारतीय बाजारात अमेरिकेला न्याय्य व योग्य प्रवेश मिळवून देण्याची हमी भारताकडून मिळत नसल्याने हा निर्णय घेत असल्याचे ट्रम्प यांनी सांगितले.
Wednesday, March 06, 2019 AT 08:57 PM (IST)
1 2 3 4
 
© Copyrights 2010 Dainik Aikya.com - All rights reserved.
of
Powered By: