Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 38
5सातारा, दि. 18 : आनंदी शिक्षण हेच जीवनाचे सार आहे, असे प्रतिपादन प्राचार्य डॉ. आर. टी. कोरडे यांनी केले. रहिमतपूर येथील डॉ. वा. गो. उर्फ काकासाहेब परांजपे विद्यालयाचा वार्षिक पारितोषिक वितरण समारंभ संस्थाध्यक्षा सौ. चित्रलेखा माने- कदम यांच्या मार्गदर्शनाखाली नुकताच उत्साहात झाला. त्यावेळी ते बोलत होते. यावेळी  रहिमतपूर नगरपरिषदेचे मुख्याधिकारी विनायक औंधकर उपस्थित होते. अध्यक्षस्थानी माजी पर्यवेक्षक एच. ए. मोदी होते.   प्राचार्य कोरडे यांनी बोधकथेतून विद्यार्थ्यांना प्रेरणा दिली. औंधकर म्हणाले, यशवंत होणे ही काळाची गरज आहे. नियोजन, सातत्यपूर्ण प्रयत्न, प्रामाणिक प्रयत्न, नेमका अभ्यास, संयम या पाच सूत्रांची जपणूक केल्यास यश निश्‍चित मिळेल. मोदी यांनी मनोगत व्यक्त केले. माजी विद्यार्थिनी सौ. सोनाली भोसले हिने मनोगत व्यक्त केले.  मुख्याध्यापक बी. व्ही. निकम यांनी प्रास्ताविक केले. सांस्कृतिक विभागप्रमुख टी. व्ही. भोसले यांनी अहवाल वाचन केले. सौ. चव्हाण यांनी क्रीडा अहवालाचे वाचन केले. ए. एस. आगालावे व सौ. झेंडे यांनी सूत्रसंचालन केले. एस. डी. कदम यांनी आभार मानले.
Saturday, January 19, 2019 AT 08:49 PM (IST)
5सातारा, दि. 10 : बोरगाव, ता. साताराजवळ चार चाकी वाहनाचा टायर फुटून झालेल्या अपघातात महिला ठार झाली तर अन्य एक जण जखमी झाला. याबाबत पोलिसांनी दिलेली माहिती अशी, की संगीता दिलीप नलावडे, (वय 45), रा. नेवाळीवस्ती, चिखली, जि. पुणे या आपल्या कुटुंबीयांसह चिखली येथून कराडकडे आय टेन्टी नंबर एमएच - 14 डीएक्स 0693 या वाहनाचा बोरगावजवळ महामार्गावर आज सकाळी 8 वाजता टायर फुटून, वाहन पलटी होऊन त्यात संगीता नलावडे या गंभीर तर त्यांचा मुलगा रोहन दिलीप नलावडे (वय 20 ) हा किरकोळ जखमी झाला. दोघांनाही तत्काळ येथील जिल्हा रुग्णालयात उपचारासाठी दाखल केले असता उपचार सुरू असताना संगीता नलवडे यांचा मृत्यू झाला. या अपघाताची नोंद बोरगाव पोलीस ठाण्यात झाली आहे.
Friday, January 11, 2019 AT 09:08 PM (IST)
5सातारा, दि. 8 : आज प्रत्येकाला स्वतःची पर्सनॅलिटी डेव्हलप करण्यासाठी शिक्षण महत्त्वाचे आहे. आपल्या विशाल भारतात अनेकजण शिक्षणापासून आजही वंचित आहेत. शिक्षण घेताना तुम्ही खूप नशिबवान आहात. कारण या शिक्षणातून शोध व संशोधन होणे महत्त्वाचे आहे तरच आइनस्टाइन, न्यूटन यासारखे चेहरे आपल्या देशातूनही निर्माण होतील, असे उदगार खा. श्री. छ. उदयनराजे भोसले यांनी मंगळवारी काढले. महाराष्ट्र राज्य शैक्षणिक संशोधन व प्रशिक्षण परिषद पुणे, राज्यविज्ञान शिक्षण संस्था नागपूर, सातारा जिल्हा शिक्षण विभाग व येथील डेक्कन एज्युकेशन सोसायटीच्या संयुक्त विद्यमाने सातारा येथील न्यू इंग्लिश स्कूलमध्ये डॉ. सी. व्ही. रमण शास्त्रनगरीत आयोजित केलेल्या 44 व्या जिल्हास्तरीय अधिवेशनाच्या उद्घाटन सोहळ्यात खा. उदयनराजे प्रमुख पाहुणे म्हणून मार्गदर्शन करताना बोलत होते. या उदघाटन सोहळ्यास जिल्हा परिषदेचे अध्यक्ष संजीवराजे नाईक-निंबाळकर, जिल्हा परिषदेचे मुख्य कार्यकारी अधिकारी डॉ. कैलास शिंदे, प्रसिध्द जलतज्ञ डॉ. अविनाश पोळ, शालेय समितीचे अध्यक्ष अमित कुलकर्णी हे प्रमुख पाहुणे म्हणून उपस्थित होते.
Wednesday, January 09, 2019 AT 08:39 PM (IST)
5सातारा, दि. 7 : वाढे, ता. सातारा गावच्या हद्दीत अज्ञात वाहनाने ठोकरल्याने झालेल्या अपघातात वीरभद्र हलगडगी, रा. संकेश्‍वर, जि. बेळगाव यांचा मृत्यू झाला. याची नोंद सातारा तालुका पोलीस ठाण्यात झाली आहे. रविवारी रात्री ही घटना घडली. वीरभद्र हलगडगी (वय 65), रा. हलगडगी चाळ, संकेश्‍वर, बेळगाव हे त्या ठिकाणी असणार्‍या एका कंपनीत नोकरीस होते. कंपनीच्यावतीने रविवारी 30 ते 35 जणांना यवत पुणे येथे एका  टुरसाठी बसमधून पाठविण्यात आले होते. या ठिकाणचे काम संपल्यानंतर ते सर्वजण पुन्हा संकेश्‍वरकडे निघाले होते. वाढेफाटा ओलांडून बाँबे रेस्टॉरंट पुलाजवळ आल्यानंतर ते सर्वजण एका हॉटेलमध्ये रात्री 11 च्या सुमारास जेवण्यासाठी थांबले. जेवण झाल्यानंतर हलगडगी हे एकटेच परिसरात असणार्‍या रस्त्यावरुन चालण्यासाठी निघून गेले.   यादरम्यान त्यांना अज्ञात वाहनाने ठोकरले. यामध्ये हलगडगी हे गंभीर जखमी झाले होते. हलगडगी यांना उपचारासाठी जिल्हा शासकीय रुग्णालयात दाखल केले. या ठिकाणी वैद्यकीय तपासणीअंती हलगडगी यांना मृत घोषित करण्यात आले.
Tuesday, January 08, 2019 AT 08:52 PM (IST)
5सातारा, दि. 7 : महाराष्ट्र राज्य विद्युत मंडळ, महानिर्मिती, महापारेषण आणि महावितरण या चारही विभागाच्या अधिकार्‍यांनी, कर्मचारी आणि अभियंत्यांनी आपल्या प्रलंबित प्रश्‍नांसाठी आज संप केला. अधिकारी, कर्मचार्‍यांनी दिलेल्या माहितीनुसार, महावितरण कंपनीमध्ये प्रचलित शाखा कार्यालची वीज ग्राहकांना सेवा देण्याच्या पद्धतीमध्ये महावितरण कंपनी मोठ्या प्रमाणात बदल करण्याच्या विचारात आहे. हा विभाग एकूण महसुलाच्या 50 टक्के पेक्षा जास्त महसूल वीज बिलांच्या अनुषंगाने देत असतो. त्यामुळे संबंधित ग्राहकांना सेवा योग्य व नियमित मिळाली पाहिजे.  महापारेषण कंपनीमध्ये प्रस्तावित व स्टाफसेटअपच्या अनुषंगाने कामगार व अभियंते यांच्या पदामध्ये खूप मोठी कपात करण्यात आली आहे. याविषयी कृती समितीमधील संघटनांनी अनेक वेळा महापारेषण प्रशासनाशी चर्चा करून बदल सुचविले होते मात्र कोणताही बदल न स्वीकारता एकतर्फी स्टाफ सेटअपचे प्रत्येक परिमंडळकरिता आदेश जारी करण्यात आला आहे. स्टाफची संख्या कमी करून असणार्‍या कर्मचारी व अभियंते मेटाकुटीला आले असताना आणखी स्टाफची संख्या कमी करून कामाचा ताण वाढविण्यासाठी जाणीवपूर्वक प्रयत्न केले जात आहेत.
Tuesday, January 08, 2019 AT 08:51 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: