Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 10
राज्यातल्या सर्व जिल्ह्यातल्या गावांच्या शेत जमिनींच्या सातबारा उतार्‍यांचे पूर्णपणे संगणकीकरण केल्याचा प्रचंड गाजावाजा तीन महिन्यां-पूर्वी सरकारने केला होता. इंटरनेट आणि स्मार्टफोनद्वारे महाराष्ट्र सरकारच्या संकेत स्थळावरून सातबारा उतारा तलाठ्याच्या ई सहीसह जलद मिळेल, अशी ग्वाही देण्यात आली होती. पण, प्रत्यक्षात मात्र ही घोषणा केलेल्या दिवसापासूनच या योजनेचे बारा वाजल्याचा अनुभव शेतकर्‍यांना आला. सरकारचे संकेतस्थळ मिळाले, तरी त्यावर सातबारा उतारे मात्र मिळत नव्हते. कधी सर्व्हर डाऊन तर कधी संकेतस्थळ मिळाल्यास संबंधित गावचा सातबारा मिळतही नव्हता. अद्यापही या गोंधळाच्या परिस्थितीत काहीही बदल झालेला नाही. शेतकर्‍यांना पीक कर्जासाठी सातबारा उतारे आवश्यक असल्याने यापुढे ई सहीचा सातबारा उतारा गृहीत धरला जाईल, असे आदेश सरकारने दिले होते. पण, प्रत्यक्षात मात्र एप्रिल महिन्यापासून डिजिटल स्वाक्षरीयुक्त उतारेच महा ई सेवा केंद्र आणि इंटरनेट कॅफेतून, व्यक्तिगत संगणकावरून मिळत नसल्याने, शेतकर्‍यांना कर्जाचे अर्ज बँकांना देण्यास अडचणी आल्या.
Tuesday, July 17, 2018 AT 08:39 PM (IST)
गेले अर्धशतक देशात आणि परदेशात योगविद्येचा प्रसार-प्रचार करणार्‍या योगाचार्य विश्‍वास मंडलिक यांच्या योगदानाबद्दल केंद्र सरकारने पंतप्रधान पुरस्कारासाठी केलेली निवड हा त्यांच्या योगप्रसाराच्या कार्याचा सन्मान होय! नाशिक येथे मध्यमवर्गीय कुटुंबात 1944 मध्ये जन्मलेल्या मंडलिक यांनी पुण्याच्या सरकारी अभियांत्रिकी महाविद्यालयातून इलेक्ट्रिकल इंजिनिअरिंगची पदवी 1967 मध्ये मिळवली. व्होल्टास ट्रान्स्फॉर्मर्स या बहुराष्ट्रीय कंपनीत पुणे येथे बारा वर्षे नोकरी केल्यावर त्यांनी नाशिक येथे इलेक्ट्रिक ट्रान्स्फॉर्मरच्या निर्मितीचा स्वत:चा कारखाना सुरू केला. याच काळात त्यांची योगसाधनाही सुरू होती. उत्तम चालणारा उद्योग बंद करून त्यांनी 1978 मध्ये नाशिक येथे योगविद्याधाम या संस्थेची स्थापना करून आपले सारे जीवन योगविद्येच्या प्रसार आणि शिक्षणासाठी समर्पित केले आहे. योगविद्याधाम या संस्थेतर्फे योगशिक्षकांना योगविद्येचे प्रशिक्षण दिले. नाशिकच्या पन्नास शाळात प्रारंभीच्या काळात शालेय विद्यार्थ्यांना योगविद्या शिक्षणाचे कार्य केले. त्यानंतर याच संस्थेमार्फत योग प्रशिक्षणाचे अभ्यासक्रमही सुरू केले.
Friday, July 06, 2018 AT 08:28 PM (IST)
  हिमालयाच्या कुशीत वसलेल्या आणि दरवर्षी बर्फवृष्टी-तुफानी पाऊस पडणार्‍या जम्मू-काश्मीर राज्याला यावर्षी पाणी टंचाईच्या संकटाला सामोरे जावे लागते आहे. राज्यातल्या शेकडो खेड्यात या वर्षीच्या उन्हाळ्यात तीव्र पाणी टंचाई निर्माण झाल्याने सरकारने, पाणी टंचाईच्या भीतीने यावर्षी खरिपाच्या हंगामात शेतकर्‍यांनी भाताची लागवड करू नये, त्याऐवजी अन्य पिके घ्यावीत, असे आवाहन केले आहे. येत्या काही महिन्यात पाणी टंचाईची समस्या अधिक तीव्र होण्याची शक्यता असल्याचे जाणवल्यामुळे राज्य सरकारने सरकारी यंत्रणेमार्फत शेतकर्‍यांनी भात पिकाची लागवड करू नये, यासाठी जागरण मोहीमही सुरू केली आहे. दरवर्षी या राज्यातल्या अडीच लाख हेक्टर क्षेत्रातल्या भाताच्या पिकाला जलसिंचन विभागातर्फे पाण्याचा पुरवठा केला जातो. पण पुरेसे पाणी उपलब्ध झाले नाही तर भाताच्या पिकाला पाणी देता येणे शक्य नसल्याने, नुकसान टाळण्यासाठी शेतकर्‍यांनी भाताची लागवडच करू नये, असा सरकारचा सल्ला आहे. बारामुल्ला, कुपवाडा, बडगाम, पुलवामा, यासह सहा जिल्ह्यात दरवर्षी उन्हाळ्यातच भाताची पेरणी आणि लागवड केली जाते.
Wednesday, April 18, 2018 AT 08:48 PM (IST)
दोन वर्षांपूर्वी ज्या मुलीने पिस्तूल पाहिलेही नव्हते, त्याच मुलीने ऑस्ट्रेलियात सुरू असलेल्या राष्ट्रकुल क्रीडा स्पर्धेत दहा मीटर नेमबाजीच्या स्पर्धेत सुवर्णपदक जिंकून नवा विक्रम घडवला आहे. वयाच्या अवघ्या 16 व्या वर्षी हे लखलखीत यश मिळवणार्‍या मनूचे लक्ष्य आता ऑलिंपिक क्रीडा स्पर्धेत सुवर्ण पदक जिंकायचे आहे. हरियाणातल्या सज्जर गोरिया या गावातल्या शाळेत शिकणार्‍या मनूचे वडील राम किशन नौदलात अधिकारी होते. सेवानिवृत्त झाल्यावर त्यांनी या छोट्या गावात इंग्रजी माध्यमाची शाळा सुरू केली. याच शाळेत तिची आई सुविधा मुख्याध्यापिका आहे. हरियाणात अद्यापही जुन्या रूढी परंपरांचा पगडा समाजात असल्याने मनूच्या आईचा विवाह अल्पवयातच झाला. त्यांना शिकायची जिद्द होती. विवाहानंतर त्या बी. ए. आणि  बी.एड. आणि नंतर एम. एड. झाल्या. संस्कृत विषयाच्या पदवीधर असलेल्या सुविधांनी मनूच्या जन्मानंतरही शिक्षण सुरू ठेवले.  मनू बाळ असताना त्या वार्षिक परीक्षा देत होत्या. झाशीच्या राणीचे मूळचे माहेरचे नाव मनू असल्याने, सुविधाने आपल्या मुलीचे नावही मनूच ठेवले. गावातल्या शाळेत मनू शिकायला लागली.
Friday, April 13, 2018 AT 08:48 PM (IST)
मध्यप्रदेश विधानसभा निवडणूक डोळ्यासमोर ठेवून पाच साधूंना राज्य सरकारने राज्य मंत्रि-पदाचा दर्जा दिल्याचा वाद आता इंदौर उच्च न्यायालयाच्या खंडपीठासमोर गेला आहे. मुख्यमंत्री शिवराज सिंग चौहान यांनी नर्मदा जलशुद्धीकरण समितीत या पाच साधूंचा समावेश करून त्यांना राज्य मंत्रिपदाचा दर्जा दिल्याचे गेल्या आठवड्यात जाहीर केल्यापासून हा वाद रंगला आहे. आता रामबहाद्दूर वर्मा यांनी आपल्या वकिलामार्फत इंदौर उच्च न्यायालयात याचिका दाखल करून या नियुक्त्या रद्द कराव्यात, अशी मागणी केली आहे. न्यायालयाने ही याचिका दाखल करून कोणत्या निकषावर आणि कोणत्या आधारे या साधूंना राज्य मंत्रिपदाचा दर्जा दिला, याबाबतचे प्रतिज्ञापत्र  येत्या 10 दिवसात दाखल करायचे आदेश राज्य सरकारला दिला आहे. नर्मदा जलशुद्धीकरणाच्या मोहिमेत नर्मदेच्या काठी सहा कोटी वृक्षारोपण केल्याचा दावा सरकारने केला होता. तेव्हा आता राज्य मंत्रिपदाचा दर्जा बहाल केलेल्या नर्मदानंद महाराज यांच्यासह पाचही साधूंनी या मोहिमेत प्रचंड भ्रष्टाचार झाल्याचे आरोप करीत सरकारच्या विरोधात नर्मदा भ्रष्टाचार निर्मूलन-नर्मदा घोटाळा यात्रेची घोषणा केली होती.
Wednesday, April 11, 2018 AT 08:59 PM (IST)
 
© Copyrights 2010 Dainik Aikya.com - All rights reserved.
of
Powered By: