Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 256
5मुंबई, दि. 14 (प्रतिनिधी) : मराठा समाजाच्या आरक्षणाबाबतचा अहवाल राज्य मागासवर्ग आयोग उद्या (गुरुवार) राज्य सरकारकडे सुपूर्द करणार आहे. मुख्यमंत्री देवेंद्र फडणवीस यांचे सरकार मराठा समाजाला किती टक्के आरक्षण देणार, हे या अहवालातील शिफारशीवरून स्पष्ट होणार आहे. महाराष्ट्रातील इतर मागासांच्या (ओबीसी) 27 टक्के आरक्षणाला धक्का न लावता मराठा समाजाला शिक्षण आणि नोकर्‍यांमध्ये स्वतंत्र आरक्षण मिळावे यासाठी राज्य सरकारने राज्य मागासवर्ग आयोगाची  स्थापना केली होती. मराठा समाजाला इतर मागासवर्गीयांप्रमाणे आरक्षण देण्यासाठी राज्य मागासवर्गीय आयोगाचा अहवाल महत्त्वाचा आहे. हा आयोग गुरुवारी आपला अहवाल सरकारकडे सुपूर्द करणार आहे. आयोगाचे अध्यक्ष न्या. गायकवाड हे मुख्यमंत्री देवेंद्र फडणवीस किंवा मुख्य सचिव डी. के. जैन यांच्याकडे हा अहवाल देण्याची शक्यता आहे. मंत्रिमंडळ ठरवणार आरक्षणाची टक्केवारी मराठा आरक्षणा संदर्भात शिफारशी करणारा राज्य मागास वर्गाचा अहवाल आल्यानंतर त्यातील शिफारशींवर राज्य सरकार अभ्यास करणार आहे. त्यासाठी हा अहवाल विधी व न्याय विभागाकडे पाठविला जाईल.
Thursday, November 15, 2018 AT 08:42 PM (IST)
5मुंबई, दि. 13 (प्रतिनिधी) : यवतमाळमध्ये अवनी (टी-1) या वाघिणीच्या हत्येचे पडसाद मंगळवारी झालेल्या मंत्रिमंडळ बैठकीत उमटले. वाघिणीच्या हत्येनंतर राज्य सरकारवर टीका होत असताना शिवसेनेच्या मंत्र्यांनी या मुद्द्यावरून भाजपला घेरण्याचा प्रयत्न केला. शिवसेनेच्या मंत्र्यांनी या मुद्द्यावर प्रश्‍न उपस्थित केला असताना वन मंत्री सुधीर मुनगंटीवार बैठकीत गैरहजर होते. ‘अवनी’वरील चर्चा संपल्यानंतर त्यांचे बैठकीत आगमन झाले. यवतमाळ जिल्ह्यातील पांढरकवडा वन परिक्षेत्रात टी-1 प्रजातीच्या ‘अवनी’ वाघिणीची गेल्या महिन्यात हत्या करण्यात आली. वाघिणीच्या हत्येवरून केंद्रीय मंत्री मनेका गांधी, शिवसेना पक्षप्रमुख उद्धव ठाकरे, मनसे अध्यक्ष राज ठाकरे व वन्यजीवप्रेमींनी राज्य सरकारला लक्ष्य केले आहे. मनेका गांधी यांनी तर सुधीर मुनगंटीवार यांच्या हकालपट्टीची मागणी केली आहे. उद्धव ठाकरे यांनी अवनीच्या हत्येची न्यायालयीन चौकशी करण्याची मागणी केली आहे. या पार्श्‍वभूमीवर राज्य मंत्रिमंडळाच्या बैठकीत शिवसेनेच्या मंत्र्यांनी अवनीचा मुद्दा उपस्थित केला. अवनीच्या हत्येबद्दल संशय व्यक्त केला जात आहे.
Wednesday, November 14, 2018 AT 08:47 PM (IST)
दोन लाख कर्मचार्‍यांना लाभ मिळणार 5मुंबई, दि. 13 (प्रतिनिधी) : राज्यातील अंगणवाडी सेविका, मिनी अंगणवाडी सेविका आणि मदतनीसांचे सेवानिवृत्तीचे वय 60 वरून 65 वर्षे करण्यास आज झालेल्या मंत्रिमंडळ बैठकीत मान्यता देण्यात आली. अंगणवाडी केंद्रात काम करण्यास शारीरिकदृष्ट्या सक्षम असलेल्या कर्मचार्‍यांना या निर्णयाचा लाभ होणार आहे. सुमारे दोन लाख कर्मचारी अंगणवाडी सेवेत कार्यरत आहेत. अंगणवाडी सेविकांच्या मानधन वाढीसंदर्भात त्यांच्या संघटनेसोबत झालेल्या चर्चेच्या वेळी सेविकांच्या सेवासमाप्तीचे वय 60 वर्षे करण्याबाबत विचारविनिमय झाला होता. त्यानुसार अंगणवाडी सेविका, मिनी अंगणवाडी सेविका व मदतनीस या मानधनी कर्मचार्‍यांचे सेवासमाप्तीचे वय 60 वर्षे करणे, मानधनात वाढ करणे याबाबतचा शासन निर्णय 23 फेब्रुवारी 2018 रोजी काढण्यात आला. मात्र, त्यांच्या सेवासमाप्तीचे वय 65 वर्षे करण्याबाबत विधिमंडळाच्या मार्चच्या अधिवेशनात सदस्यांनी मागणी केली होती. त्यानुसार काही अटींच्या अधीन राहून कार्यरत असलेल्या सेविकांचे सेवासमाप्तीचे वय 65 वर्षे ठेवण्याबाबत विचार करण्यात येईल, असे आश्‍वासन सभागृहास देण्यात आले होते.
Wednesday, November 14, 2018 AT 08:43 PM (IST)
सदाभाऊ खोत यांचा राजू शेट्टींना टोला 5मुंबई, दि. 13 (प्रतिनिधी) : पश्‍चिम महाराष्ट्रात स्वाभिमानी शेतकरी संघटनेने उसाच्या दरासाठी पुकारलेले आंदोलन म्हणजे कारखानदारांबरोबर मिळून ठरवलेला फार्स होता, अशी टीका करतानाच, ते ज्या शाळेत आहेत, त्या शाळेचा मी ‘हेडमास्तर’ होतो त्यामुळे प्रमाणपत्रे कशी निघतात, ते मला चांगलेच ठाऊक आहे, असा टोला पणन राज्यमंत्री व रयत क्रांती संघटनेचे नेते सदाभाऊ खोत यांनी आज खा. राजू शेट्टी यांना लगावला. मंत्रालयात पत्रकार परिषदेत बोलताना राज्यमंत्री सदाभाऊ खोत यांनी राजू शेट्टी यांचे नाव घेता त्यांच्यावर अप्रत्यक्षपणे निशाणा साधला. काही दिवसांपूर्वीच खा. राजू शेट्टी यांनी पश्‍चिम महाराष्ट्रात काही ठिकाणी ऊस उत्पादकांना एकरकमी एफआरपी आणि 200 रुपयांचा जादा भाव मिळावा यासाठी आंदोलन केले. साखर कारखान्यांना कायद्यानुसार एफआरपी देणे बंधनकारक आहे. कारखान्यांनी एफआरपीची रक्कम दिली नाही तर त्यांच्यावर कारवाई केली जाते. केंद्र सरकारने रिकव्हरीच्या 10 टक्क्यांच्या आधाराला 2750 रुपये भाव देण्याचे जाहीर केले आहे. त्यामुळे शेतकर्‍यांना आपो-आपच 200 रुपये जास्त मिळणार आहेत.
Wednesday, November 14, 2018 AT 08:39 PM (IST)
दोन्ही राजे समर्थक अडचणीत : पोलिसांच्या अहवालाची न्यायालयाकडून गंभीर दखल 5सातारा, दि. 13 : सुरुची राडा प्रकरणात जामीन देताना न्यायालयाने घातलेल्या अटी संशयितांनी पाळल्या नसल्याचे उघड झाले आहे. नगरविकास आघाडीच्या विनोद उर्फ बाळू खंदारे आणि अतुल चव्हाण या दोन नगरसेवकांसह दोन्ही राजांच्या एकूण 37 जणांना जामीन रद्द का करण्यात येवू नये, अशा आशयाची कारणे दाखवा नोटीस न्यायालयाकडून पाठवण्यात आली आहे. या घटनेने सातार्‍यात खळबळ उडाली आहे. या नोटीसीमुळे दोन्ही राजांचे समर्थक अडचणीत सापडले आहेत. पोलिसांनी दाखल केलेल्या अहवालाची न्यायालयाने गांभीर्याने दखल घेतली आहे. याबाबत अधिक माहिती अशी, गेल्या वर्षी कोजागरी पौर्णिमेच्या मध्यरात्री  आनेवाडी टोल नाक्यावरुन खासदार व आमदार  कार्यकर्त्यांसह सुरुची बंगला परिसरात समोरासमोर आले. या घटनेत तुफान राडा होवून फायरिंग, जाळपोळ व तोडफोड झाली होती. या घटनेत फायरिंगमध्ये कोणी जखमी झाले नाही. मात्र वाहने अंगावरुन गेल्याने पाय तुटले, काही जण जखमी झाले.  गाड्या फोडण्यात आल्याने मालमत्तेचेही नुकसान झाले होते.  या घटनेने सातारा शहरासह संपूर्ण जिल्हा हादरला होता.
Wednesday, November 14, 2018 AT 08:31 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: