Dainik Aikya - Published from Satara (Maharashtra,India) Published on,
 
नागालँडमध्ये भाजप आघाडीचा सत्ता स्थापनेचा दावा
ऐक्य समूह
Monday, March 05, 2018 AT 11:12 AM (IST)
Tags: na1
5कोहिमा, दि. 4 (वृत्तसंस्था) : नागालँडमध्ये एनडीपीपी-भाजप आघाडीने 32 आमदारांच्या पाठिंब्याचे पत्र राज्यपाल पी. बी. आचार्य यांच्याकडे सोपवत सत्ता स्थापण्याचा दावा केला आहे. राज्यपालांनी हा दावा स्वीकारत एनडीपीपीचे नेते निफियू रिओ यांना सत्तास्थापनेचे आमंत्रण दिले आहे.
60 सदस्यसंख्या असलेल्या नागालँड विधानसभेत एनडीपीपी-भाजप आघाडीला 29 (एनडीपीपी-17, भाजप- 12) तर एनपीएफ आघाडीला 29 (एनपीएफ-27, अन्य-2) जागा मिळाल्या आहेत. यात सत्तास्थापनेसाठी सर्वात आधी कोण दावा करणार, याकडे सर्वांचे लक्ष लागले होते. मात्र, भाजप आघाडीने वेळ न दवडता सत्ता स्थापनेचा दावा करून बाजी मारली आहे. नॅशनॅलिस्ट डेमॉक्रेटिक प्रोग्रेसिव्ह पार्टीचे नेते (एनडीपीपी) निफियू रिओ आणि भाजपचे वरिष्ठ नेते राम माधव यांच्यासह आघाडीच्या अन्य नेत्यांनी राज्यपाल आचार्य यांची भेट घेऊन सत्तास्थापनेचा दावा केला. यावेळी 32 आमदारांचा पाठिंबा असल्याचे पत्र राज्यपालांना देण्यात आले.
एनडीपीपी-भाजप आघाडीकडून निवडणुकीआधीच रिओ हे आघाडीचे मुख्यमंत्रिपदाचे उमेदवार असतील,  असे जाहीर करण्यात आले होते. त्यामुळे राज्यपालांकडून आमंत्रण मिळाल्याच्या पार्श्‍वभूमीवर रिओ हे नागालँडचे नवे मुख्यमंत्री असतील, हे जवळपास निश्‍चित झाले आहे.
एनपीएफला आशा
दुसरीकडे मुख्यमंत्री टी. आर. झेलियांग यांच्या नॅशनल पीपल्स फ्रंटकडून (एनपीएफ) सत्तास्थापनेसाठी हालचाली सुरू आहेत. 27 जागांसह सर्वात मोठा पक्ष ठरलेल्या एनपीएफला सर्वात आधी सत्ता स्थापनेची संधी मिळायला हवी, असा दावा झेलियांग यांनी केला आहे. भाजप आमच्यासोबत आघाडी करण्यास तयार असेल तर आम्हालाही ही आघाडी मान्य असेल, असा डावही झेलियांग यांनी टाकला आहे. विशेष म्हणजे झेलियांग यांच्या सरकारमध्ये भाजपचे दोन मंत्री आहेत. मात्र, भाजपने झेलियांग यांच्या पक्षाशी आघाडी न करता एनपीएफमधून बाहेर पडून नवा पक्ष स्थापन करणार्‍या रिओ यांच्याशी निवडणूकपूर्व आघाडी केली होती.

© Copyrights 2014 Dainik Aikya.com - All rights reserved.
of
Powered By: