Dainik Aikya - Published from Satara (Maharashtra,India) Published on,
 
भुजबळ छोडो आंदोलन झाले पाहिजे: राज ठाकरे
ऐक्य समूह
Tuesday, February 06, 2018 AT 11:02 AM (IST)
Tags: mn3
5मुंबई, दि. 5 (प्रतिनिधी) : बेहिशेबी मालमत्ता प्रकरणात तुरुंगात असलेले राष्ट्रवादी काँग्रेसचे नेते आणि माजी मंत्री छगन भुजबळ यांच्या सुटकेसाठी समर्थकांनी सोमवारी मनसे अध्यक्ष राज ठाकरे यांची भेट घेतली. आता भुजबळ छोडो आंदोलन झाले पाहिजे, असा सल्ला ठाकरेंनी भुजबळ समर्थकांना दिला.
भुजबळ गेल्या अनेक महिन्यांपासून तुरुंगात आहेत. त्यांच्या सुटकेसाठी समर्थक सर्वपक्षीय नेत्यांच्या भेटी घेत आहेत. त्यांनी आज सकाळी राज ठाकरे यांची ‘कृष्णकुंज’वर भेट घेतली. आमचा विकास तुरुंगात कोंडला गेला आहे. नाशिक जिल्ह्याकडे लक्ष देणारा नेता नाही,  
असे गार्‍हाणे त्यांनी ठाकरेंसमोर मांडले. त्यावर भुजबळ यांना कधीच जामीन मिळायला हवा होता. आता भुजबळ जोडो नाही तर भुजबळ छोडो आंदोलन झाले पाहिजे, असे ठाकरे म्हणाले.
दरम्यान, दोन वर्षांपासून सूडाचे राजकारण सुरू आहे. भुजबळ हे त्याचे बळी आहेत. त्यांना जामीन मिळू शकला नाही. त्यांच्या सुटकेसाठी आम्ही सर्व पक्षाच्या नेत्यांच्या भेटी घेत आहोत. नाशिकमध्ये ’अन्याय पे चर्चा’ सुरू केली आहे. मुख्यमंत्र्यांचीही भेट घेणार आहोत, असे समर्थकांनी सांगितले.
जामीन अर्जावर बुधवारी सुनावणी
बेहिशेबी मालमत्ते प्रकरणी तुरुंगात असलेल्या छगन भुजबळ यांच्या जामीन अर्जावर बुधवारी मुंबई उच्च न्यायालयात सुनावणी होणार आहे. ‘प्रिव्हेंशन ऑफ मनी लाँड्रिंग’ (पीएमएलए) न्यायालयाने त्यांचा जामीन अर्ज फेटाळल्यानंतर त्यांनी उच्च न्यायालयात धाव घेतली आहे.

© Copyrights 2014 Dainik Aikya.com - All rights reserved.
of
Powered By: